عن الحرية المغلوطة

أنا جاية أتكلم عن موضوع أعتقد إن ناس كتير هتعارضني فيه أو مش هتتفق مع وجهة نظري. بس عامةً أنا مش جاية هنا عشان أقنع حد ، لكم كل الحرية في الإختلاف مع وجهة نظري أو إبداء آرائكم الشخصية ، كله حلو منكم والله J الموضوع عن التحرش الجنسي ، بشكل غير مباشر شوية.

فاكرين من سنتين موضوع البنت التي تم التحرش فيها بشارع قريب من بيتها في الخليفة المأمون ، و استطاعت البنت الهرب ، بس ساعتها ناس كتير إختلفت آراءهم حول ما حدث؟ طبعاً الأهالي الكبار أو الناس المتشددة أو كده قالت ساعتها إن البنت راكبها الغلط من ساسها لرأسها و إنها يا نهار أزرق إزاي تلبس اللبس الفاجر اللي هي كانت لابساه دا ، على الرغم من أنني أتذكر جيداً إنها كانت لابسة لبس عادي جداً جداً مفيهوش أي حاجة بس الفكرة إنها مش محجبة ، و ممكن كانت جميلة شكلاً شوية فلفتت الأنظار أكثر (على الرغم من إن دا مش مبرر خالص و من إن مش دا اللي أنا عايزة أتكلم فيه).

الي عايزة أتكلم فيه و مضايقني من فترة بسبب أنني سمعت الموضوع من كذا حد ، إن البنات وجهة نظرها في الموضوع دا كالآتي: و الناس مالها؟ ماتلبس اللي هي عايزاه و المفروض الرجالة يغضوا البصر.

مش عارفة ، بصراحة أنا شايفة إننا كبنات بنضحك على نفسنا شويتين. فأولاً كدا ، لو هتقولي للناس كدا هتقولّك طب ما هو ياعيني مش لاقي يتجوز و دي غلطة المجتمع. أكيد إحنا هنعتبر التبرير دا تبرير فاشل جداً و مش منطقي. بس معلش ، مش برضو في التكوين الجسماني للبني آدم و هرموناته و شهواته ، مش كلنا عارفين إن الرغبة الشهوانية للرجال أكثر بكثير من النساء؟ بدليل إن حوادث الإغتصاب بتحصل من رجال مش من نساء.

حاجة تانية ، إنتي لو شايفة إنه المفروض يغضّ بصره و يتّقي ربنا..مش المفروض إنّك إنتي كمان تعملي اللي عليكي و تقدّري إن دي فعلاً حاجة صعبة على الرجال مش زي ما إنتي متخيلة؟ أنا يا جدعان مش بدافع بتاتاً-على الرغم من إنكم ممكن تفتكروا كدا- بس بجد أنا شايفة إن الحرية بحدود ؛ فا زي ما إنتي تعديتي حدودك و لبستي اللي يلفت نظره ، هوا هيتعدى حدوده و يجري وراء شهوته. و خلاصة الأمر إنني مقتنعة مئة بالمئة إن الحرية لا تعني شيئاً طالما آذت الآخرين و إستفزتهم لعمل حاجات مش كويسة. مفهوم الحرية عندنا مفهوم شخصي بس ، زي ما إنتي شايفة إنك حرة في لبسك (مع إنك بتجرحي الراجل اللي قدامك) هو برضو هيشوف إنه ليه حقّ يبصبص (مع إنه بيجرحك).

خلاصة القول ، الموضوع دا مشكلة من عند الطرفين ، إلا إذا كانت البنت-و اللي زي حالاتي و حالات كل صحابي و معارفي- لبسها عادي جداً و ممكن يوصل لعبايات كمان ، و لا زالت بتتعاكس ، فدا موضوع تاني تماماً مبغلّطش فيه البنت أكيد أكيد. و ربنا يهدي الجميع. و لنا الله.

فييل فري تو شير يور أوبينيون!

0 comments:

Post a Comment